هيييييه , , , تنهيدة بحرقة , هو احنا بنعيش ليه , حر و قرف و تعب و جري في كل حتة عشان نجيب فلوس زيادة , أكيد ما هو لازم أجيب عربية حلوة , عشان ابني دور زيادة في العمارة , و يا حبذا أسيب الشقة الأيجار و ادور على شقة تمليك في الصحراء الغربية , دا غير كمان العربية دي بقالها معايا 5 سنين بحالهم لازمن اغيرها واجيب واحدة احلى.
كل الناس عمالة تجري , كل ناس دماغها بتلف بسرعة الصاروخ , داخلين سباق كل واحد عاوز أكتر و أكتر و مفيش حاجة ليها نهاية , خصوصا لو يا عيني اتجوزت واحدة من اللي ليل نهار نازلة تزن , عاوزة , عاوزة , عاااااوزة يا برعي , ويا حلاوة لو كانت من الستات البلاسيتك من بتوع السينيه و الماركات العالمية , ولازم الميك اب يكون من كرستيان ديور اللي صباع الروج بالشئ الفلاني , الحلو بقا انها مش بتحطه ليك ياللي مخروب جيبك , لأ بتحط منه لما تكون رايحة بارتي عشان تعرف تبوس صاحباتها كويس
:P
كل دا الناس عمالة تحرق في نفسها مجهود ذهني و عضلي و مفيش حاجة تخفف عليهم , على طول في قلق إن مكنش من المرتب يبقا من سعر اللحمة إن مكانتش اللحمة يبقا رئيس العمل اللي مطلع عنينا إن مكنش الريس يبقا الريس اللي في البيت "حرمه المصون" مستنياه بالمغرفة على باب الشقة وهات المرتب يا معلم, ومفيش في دماغهم سبب مقنع يقفوا عشان ياخدوا نفسهم , يا عم دا الوقت فلوس , اهبر و اهبشو عبي شوالات.
بقينا في سعار مادي محدش عارف إمتا يقول بس.
ديل كارنيجي بيحكيلنا و يقول إن 1/10 من سكان إمريكا معرض للإصابة بإنهيار عصبي نتيجة القلق
معانا واحد أمريكي من أصل مصري , بيوصف حالة شغله في أمريكا , بيشتغل 12 ساعة متواصلة من كتر القلق و المشاكل و الضغط العصبي , الراجل يا عيني بقا ضغط دمه مرتفع و بقا عنده السكر , و كان عايش هناك على أدوية الضغط و السكر , الحلو بقا بيقول انه من ساعة ما جه ليبيا و الشغل خفيف و بطل ادوية الضغط تماما , بقاله أكتر من 7 شهور مبيبلبعش أي أدوية.
الخبر التاني اللذيذ , إن الدكاترة النفساويين في ماما أمريكا بيتوقعوا إن 1/20 من الأمريكان لازم يقضوا فترة من حياتهم في مصح عقلي "مستشفى مجانين" بسبب القلق.
الخبر التالت , في الحرب العالمية التانية 1/6 من الشباب الأمريكي اللي متقدم للتطوع في الجيش الأمريكي رجعوه لأنه مصاب بنقص عقلي – اعتقد حتة من مخه حد خدها عملها بشوية بيض و سمنة بلدي
^_^
الفكرة يا لورد إننا مش بنقولك إنك متتعبش و يطلع عين اللي خلفوك و كدا , و أنك تتعب و تجري ورا اللي أنت عاوزه, احنا بس بنقولك حافظ على انسانيتك و على نفسك و على اللي حواليك و بيحبوك – أنا بحب حبيبة أوي
ايه اقصى حاجة ممكن توصلها؟
ونرجع لماما امريكا تاني , ودكتور نفساوي كبير بيقولنا أنه كشف على أكتر من 176 رجلا من أنجح راجل الأعمال في أمريكا وكلهم معدوش ال 44 سنة , لقى سيادته إن 1/3 من الناس دي بتاعني من مرض عضال ناشئ عن القلق و توتر الاعصاب ما بين خفقان في القلب و قرحة مزمنة في المعدة و ارتفاع في ضغط الدم , ويا عيني مفيش ولا واحد منهم لسا وصل لل45 سنة
يا أخ يا للي بتقرا , هل تعتقد انك كدا ناجح لما بتشتري النجاح اللي انت فيه بقرحة في المعدة فمتعرفش تاكل البيض البلدي بالبسطرمه معمول بالسمنة البلدي مع رغيف عيش بتاوي كبير؟
هل تعتقد انك تشتري النجاح بتاعك بخفقان في القلب فمتعرفش تركب عجلة او تجري او تفرح أوي؟
معلش سؤال كمان : هل تعتقد انك تشتري النجاح بأرتفاع في ضغط الدم فتقضي ليالي مش عارف تنام و دماغك هتفرقع وعنيك واجعاك و جاحظين لبرا و لونهم أحمر و مش طايق تسمع صوت لأن أي صوت عالي اوي؟
يعني يا اخينا في الأول و في الاخير كدا كدا مش هتعرف تنام غير على سرير واحد و مش هتقدر تاكل أكتر من 3 وجبات "لو عندك قرحة هتاكل مسلوق – ولو عندك ضغط تاكل من غير ملح – لو عندك خفقان خلي بالك من الكوليسترول" و وطبعا من كتر القلق على ملايينك اللي في البورصة مش هتعرف تنام , بذمتك ايه الفرق بين الأخ رجل الأعمال و بين عم جمعة البقال اللي على الناصية , اللي نازل ضحك مع اللي رايح و اللي جاي و في آخر اليوم يروح بيتهم ينام زي الفل و يرجع تاني يوم الصبح عينه "بسم الله ما شاء الله" منورة و بيضا و زي العسل و نايم و لا كأنه من أهل الكهف.
;)
سيدنا النبي بيقول لينا حل لطيف أوي , بس هنتعبكم معانا و نخليكم تفكروا , حبيبنا قال:
("من جعل الهم هماً واحدا كفاه الله هم الدنيا , ومن تشعبته الهموم لم يبال الله في أي أودية الدنيا هلك")
حد فهم حاجة , اعتقد ان اللي وصلنا إن الواحد لازم يكون همه و تركيزه على حاجة واحدة عشان ربنا يساعده و ييسر أموره و كدا يعني , اما لو واحد الهموم تشعبته , يعني خلي همومه كتير لدرجة انه تفرق بين القبائل و مش عارفني نلمه من السوق فدا عوضه على ربنا و خلي المصايب تاخده دا راجل تايه ميستاهلش
طب يا ترى يا هل ترى ايه هو الهم الواحد اللي مفروض نركزوا عليه ؟
سيدنا النبي مش هيسبنا نضرب أخماس في أسداس (ياريت لو حد عرف يعني ايه يقولي) , سيدنا النبي قال:
("من كانت الآخرة همه جعل الله غناه في قلبه , وجمع له شمله وأتته الدنيا و هي راغمة , و من كانت الدنيا همه جعل الله فقره بين عينيه , و فرق عليه شمله , و لم يأته من الدنيا إلا ما قدر له")
إزاي يا ريس تخلي الآخرة همك و أنت مستسلم لنفسك الأمارة بالسوء , و مستنى الدافع من برا انه يزقك و يخليك تتحرك , إزاي و انت مستسلم ليها تماما وتقول ما باليد حيلة لو كان فيه حاجة في ايدي كنت عملتها من زمان , دي النفس دي باد بوي و امارة بالسوء , , , إزاي؟
سيدنا النبي قال كمان : ("تفرغوا من هموم الدنيا ما استطعتم, فإنه من كانت الدنيا أكبر همه أفشى الله ضيعته , وجعل فقره بين عينيه , و من كانت الآخرة أكبر همه جمع الله له أموره , و جعل غناه في قلبه و ما أقبل عبد بقلبه على الله عز و جل إلا جعل الله قلوب المؤمنين تفد إليه بالود و الرحمة و كان الله إليه بكل خير أسرع")
المطلوب مننا الاعتدال في كل حاجة , الاعتدال في الطلب , العقل ثم العقل , يا اخينا قواك النفسية و اعصابك و فكرك الحاجات دي أهم ما تملك , من غيرها مش هتعرف تتحرك , من غيرها أنت و لا حاجة , حافظ على الناس اللي حواليك و مش عاشان مصلحتك تدوس عليهم و تطلع فوقيهم ,إنما الدين المعاملة , انا اعرف ناس بتدوس اللي قدامها عشان مصلحتها , مصلحتها و بس و ميهمهاش و لو في لحظة إنها تفكر في اللي قدامها , عرفت منهم ناس كتير , و أذوني و جرحوني لأني كنت بثق فيهم في يوم من الأيام , كل دا لأنهم محمومين ملهوفين مسروعين على هدف وصورة في دماغهم و ميهمهمش مين يجي قدامهم , اللي ييجي يدوسوا عليه.
متخيلين , كل دا حصل لأننا نسينا همنا الأول , تشعبت همومنا , بقت حاجات كتيرة اوي عجيبة رايحة يمين و رايحة شمال , لحد ما بقينا في متاهة وسطيها.
ونتيجة كل دا بقا فيه احقاد و ناس بتكره بعض و ناس بتزنبق بعض , و اللي كان صاحبي امبارح النهاردة ابيعه مع أول موقف , طبعا دا بيقولك الحزب الوطني مصلحتك أولا , إذا كانت الحكومة ذات نفسيها بتقولك كدا , و تحول الانسان من كائن لطيف إلى قرد الغاب طويل الناب مفترس اللحم و شارب العناب.
سيبكم من المصيبة دي و نبص على مصيبة تانية , إنه فيه ناس هتفهم الأحاديث دي غلط , يعني خلاص نكرش الدنيا و نديها بالجزمة , و ملهاش لازمة العلوم و المنافع الحياتية الدنيوية و بيحاربوها كمان
كنت راكب مرة مترو الأنفاق و عمال أقرأ شرح النظرية النسبية لبرتلاند رسل و مستكنيص و عمال أتخيل و قطر رايح و دبانة بتلف و عمال اتخيل نسبيه بقا , إذ فجأة نطلي واحد في نص الكتاب خضني و قالي , اسمك ايه , قولتله محمد , أي خدمة ؟ قالي بقا يا أخ محمد تضيع وقتك في حاجات ملهاش لازمة بدل ما تستغل وقتك في المترو في حاجة مفيدة , طلع مصحف اقرأ لك آيتين خد حسنات , هتعمل ايه بالنسبية و لا هتسوي لينا ايه النسبية , كلنا هنموت يا أخ محمد , المهم إني قعدت اناقش فيه أكتر من نص ساعة محاولا اقناعه لحد ما زنقته فراح قال انا مش هناقشك انت مش عاوز تقتنع انت مجاااادل بالبااااطل يا أخ محمد و سابني ومشي بعد ما حرق دمي و نشف ريقي.
الفكرة في ايه أن من حق الدنيا علينا إننا نشتغل فيها و إننا نعمرها و إننا نحقق مبدأ الاستخلاف في الأرض و إعمار الأرض , و إننا نستمتع بنعم الله لنا في الدنيا بما يحفظ حياتنا و يسعدها و دا ممكن يخلينا نتعب و نجري ورا الموضوع دا شوية , بس مفيش مانع طالما , , , طالما
حاطين قدامنا إيه هو الصح , , , ايه هو الصح في كل حاجة , في قلبنا و مع نفسنا و مع كل واحد معدي في الشارع و مع الناس اللي بنحبها , مع كل ورقة بنكتبها , مع كل فكرة بتفكر فيها , و مع كل نفس بيطلع من صدرك , و مع كل صوت بتسمعه و كل دمعة بتبكيها . . . آ آ آ ه يا قلبي
وعشان كل دا , هنلاقي إن الأسلام , لأنه دين الفطرة , بيبتدي من القلب . . . الإسلام دين طيب , حنين , دين أخلاق و قيم و مبادئ , دين حب , دين إشاعة المحبة بينا كلنا , و زي قال سيدنا عيسى عليه السلام , الله محبة
المشكلة الكبيرة اوي اللي سيدنا النبي شايفها وعارفها , إن حب المال حب قوي جدا , يقدر يتملك و يجر أي واحد وراه زي عيل صغير عمو الشرير سحبه تحت السلم عشان يديه المصاصة , بيقولك من الحقائق المعروفة إن لما اسهم البورصة تنزل تلاقي قدامها حاجات كتيرة اوي بتطلع السكر و ضغط الدم و الكوليسترول كله بيطلع عند الناس اللي ليها أسهم في البورصة.
سيدنا النبي قال عن الموضوع دا و حذرنا منه و ادانا كمان الحل ("إن هذا المال خَضِرُ حلو , من أخذه بسخاوة نفس بورك له فيه , و من أخذه باستشراف نفس لم يُبارك له فيه , وكان كالذي يأكل ولا يشبع")
الفكرة هنا يا خوي , انك لما تاخد الفلوس تاخدها و هي مش فارقة معاك . . . خدتها زي مخدتهاش , لأنك متوكل على ربنا , بتطلب اللي يكفيك , و عندك ثقة في ربنا انه هيوفقك للخير و هييسر ليك كل حاجة أفضل
سر في طريق الله لله
ولا تلق بالاً للمال , فهو من الله و لله
يعني في ناس تحوش الفلوس و تجوع نفسها , و ناس عمالة تدور على الفلوس وهي القلق هيقتلها أحسن يجي يوم و متلاقيش فلوس , و ناس تانية عمالة تفكر ازاي تجيب كمان و كمان و كمان
اعرف واحد كان مسافر برا مصر عشان يسد دين كان عليه , و كانت نيته انه أول ما يسد الدين دا , يرجع مصر طوااالي , المهم , سدد الدين و قال طب ما اقعد لحد ما أجمع فلوس الحج و مفيش مانع لو ابني دور كمان في البيت بتاعنا.
سيدنا النبي قال: ("يا أيها الناس إن الغنى ليس عن كثرة العَرَض , و لكن الغنى غنى النفس , و إن الله عز و جل يؤتي عبده ما كتب له من الرزق , فأجملوا في الطلب , خذوا ما حل و دعوا ما حَرُم")
غني النفس تعني انك غني بنفسك متفرق معاك ماركة اللبس ولا النضارة بتاعتك (مفيش مانع لو معاك فلوس تدلع نفسك) متفرقش معاك ماركة العربية زوبة بتاعتك , متفرقش معاك فارش بيتك بأيه "بس لازم يكون عندك صوفا عشان اقعد عليها لما ازورك" , متفرقش معاك اي حاجة من الحاجات دي , عشان كدا محدش يقدر يأثر عليك أو يغير رأيك في حاجة أنت مؤمن بيها , أنت أبي , عزيز , شامخ , واد جامد اوي متفرقش معاه الحاجات دي.
الشخص الغني النفس دا عارف و مدرك قيمة الحاجات دي بالنسبة للحاجة للي عند ربنا , عشان كدا متفرقش معاه لو مكانتش موجودة , لو كانت موجودة هيحمد ربنا و ينبسط اوي , لو مكانتش موجودة برضه هيحمد ربنا , الأدراك دا و المعرفة دي , هتخلي النفر مننا قلبه مبسوط و منشرح زي ما ربنا وصف في القرآن و قال سبحانه و تعالى:
("الَّذِينَ آمَنُواْ وَتَطْمَئِنُّ قُلُوبُهُم بِذِكْرِ اللّهِ أَلاَ بِذِكْرِ اللّهِ تَطْمَئِنُّ الْقُلُوبُ {28} الَّذِينَ آمَنُواْ وَعَمِلُواْ الصَّالِحَاتِ طُوبَى لَهُمْ وَحُسْنُ مَآبٍ")
الناس دي مبسوطة لأنها مخلصة لله , شغالة و بتعمل كل حاجة لله و مخلصه ليه هو بس , و مطمنة و مش قلقانة من حاجة , الناس دي سيدنا النبي قال عليهم حاجات حلوة كتير , قال:
("طوبى لمن طاب كسبه , و صلحت سريرته , و كرمت علانيته , و عزل عن الناس شره , طوبى لمن عمل بعلمه , و أنفق الفضل من ماله , و أمسك الفضل من قوله")
يااااااه , , , شوفتوا الناس دي حلوة أوي إزاي , انا لما كنت صغير كنت بستغرب كلمة طوبى و كنت فاكر انها طوبة فقلت يعني الناس دي كل واحد فيهم هياخد حجر او نحدفه بيه يعني , المهم لما كبرت عرفت إنها طوبى و إن طوبى دي مكان حلو اوي اوي اوي في الجنة
خبر تاني من أمريكا , بيقولك في الحرب العالمية التانية , مات 1/3 مليون أمريكي , و في نفس الفترة مات مليون أمريكي بمرض القلب نتيجة القلق , و دا خلا دكتور نفساوي كبير تاني يقول , اصحاب الأعمال اللي ميعرفوش إزاي يكافحوا القلق أبشرهم , هتموتوا قريب يا حلوين
مثال مش عارف افهمه اوي , بيقولك إن عدد الدكاترة اللي بتموت بمرض القلب أكتر بعشرين ضعف عدد الفلاحين اللي بيموتوا بنفس المرض , يمكن لأن الدكاترة حياتهم متعبة و سبع سنين دراسة في طب و بعد ما يتخرج يدور على الخمسة عين , عروسة أو عريس , و عمارة , و عيادة , و عربية , و عزبة , كتير اوي كدا عليهم و في الاخر هيموتوا و يسيبوا الحاجات دي لولادهم بعد ما يكون الدكتور الغلبان اتعصر و طلع عينه.
القلق و الهم بيكسروا الناس و يخلوا الواحد يخس و يكبره قبل سنه بكتير و يخلي جلدك يكرمش و شعرك يقع , امال ليه كتير من الرجالة المصريين قرع ليه ؟؟؟ من كتر الهم و النكد اللي عاملاه الحكومة عليهم
فيه شاعر من بتوع زمان بيقول
و الهم يخترم الجسيم نحافة * * * و يشيب ناصية الصبي و يهرم
تقريبا بيقول الهم هيخرم التخين و يفسيه ويبقا رفيع , فخلي بالك لأحسن حد يخرمك , ويخلي الصغير شعره يشيب , على فكرة دا بجد , انا ليا واحد صاحبي شعره من كتر القلق و التوتر اللي أهله بيعيشوه فيه فترة الامتحانات , طلع شعر ابيض في راسه من واحنا لسا عندنا 16 سنة
وطبعا كلنا عارفين إن سيدنا يعقوب أتعمى من كتر الهم و الحزن على سيدنا يوسف
بس من الأكيد مفيش حد يقدر على طول محتفظ بالبشاشة و التفاؤل و السعادة و كدا يعني , أكيد ممكن يحصل في لحظة ما تحل عليه مصيبة , او تحصل حاجة تزعله و تدايقه
ساعتها , و لأن الراجل دا مؤمن و راجل مية مية , هيلجأ لربنا , مش هيستسلم لتيار الكآبة و الحزن , لأنه لو استسلم كدا بيفتح سكة لأنهيار كامل في الإرادة و بالتالي هيشله عن أي حاجة هو عاوز يعملها , أو اي حاجة هتقدر تطلعه من المصيبة و الحزن اللي هو فيه.
عشان كدا الإسلام بيقدم لينا حلول للحاجات دي كلها
سيدنا النبي في يوم من الأيام كان داخل المسجد النبوي في غير وقت صلاة , لقى واحد من الأنصار اسمه أبو أمامة قاعد فقال ("يا أبا أُمامَةَ! ما لي أرَاكَ جالِساً في المَسْجِدِ فِي غَيْرِ وَقْتِ صَلاةٍ؟ قال: هموم لزمتني وديون يا رسول اللّه قال: أفَلا أُعَلِّمُكَ كَلاماً إذَا قُلْتَهُ أذْهَبَ اللَّهُ هَمَّكَ وقضى عَنْكَ دَيْنَكَ؟ قلت: بلى يا رسول اللّه قال: قُلْ إذَا أصْبَحْتَ وَإذَا أمْسَيْتَ: اللَّهُمَّ إِني أعُوذُ بِكَ مِنَ الهَمّ والحُزن، وأعُوذُ بِكَ مِنَ العَجْزِ والكَسَلِ، وأعُوذُ بِكَ مِنَ الجُبْنِ والبُخلِ، وأعوذُ بِكَ مِنْ غَلَبَةِ الدَّيْنِ وَقَهْرِ الرّجالِ") قال: ففعلتُ ذلك، فأذهبَ اللّه تعالى همّي وغمّي وقضى عني ديني.
أكيد الكلام اللي قاله سيدنا النبي مش كلام سحري , بس اللي عمله سيدنا النبي انه خلى أبا أمامة يفوق من اللي هو فيه و يرجع تاني للدنيا يشتغل و يدوس فيها عشان في الأخير يلاقي حل للهموم الل راكبة فوق راسه
الدعاء دا و زيه كتير , حاجة محمسة جدا , تخليك تفوق و تمشي بقوة , تكون ماشي و تعبت , تكون ماشي و حصلت ليك مشكلة و اصابك همك , تقول الدعاء من دول تلاقي الدم جري في عروقك , كأنك بتنشد نشيد حماسي في ساحة الوغى , الأدعية دي وسيلة نتغلب بيها على مشاكل الدنيا و ترجعل لينا قوتنا و تجدد يقيننا بأن الله معنا و أنه على كل شئ قدير.
بعض الناس بتعتبر إن الدعاء مجرد موقف سلبي من الحياة , هو صح لو أنت بتدعي قاعد في مكانك و مبتعملش حاجة و مفيش سعي نحو الشئ اللي بتدعي بيه , و دعائك ببساطة عبارة عن أماني بتقولها و حاطط ايدك على خدك و مستني بكرا هيجي بأيه , فلمؤخذة الدعاء بتاعك يعتبر لغو و ملوش وزن عند ربنا
يعني بذمتك , ينفع واحد شاب زي الورد , قاعد على قهوة التكعيبة في وسط البلد , ونازل طول اليوم ضرب في قهوة وشاي و بيقول: ياااارب , , , يارب , ارزقني بشغلانة يارب , اطرد اسرائيل يارب , متخليش جمال مبارك يمسك الحكم يارب , او ممكن بدل ما يبقا قاعد على القهوة يروح يقعد في حضن الست الوالدة و يقول : ياااارب , , , يارب جوزني يارب , عاوز شقة و شبكة و وعفش للشقة و تمن الفرح و تمن فستان وميك اب العروسة يارب
دا يعتبر لغو ولا لأ , ربنا بيقولك اسعى و انا اسعى معاك , مفيش حاجة بتيجي على الجاهز.
فأنت كل اللي عليك يا ولدي , انك تعمل و تشتغل و ترضى بما قسمه الله لك , بس خلي بالك , مش معن الرضا انك تبقا متبلد متعطل كسول , و تقول كفاية اللي جالي لحد كدا , بيقال إن الرضا المطلق يبعث على البلادة , لازم يكون في عندك نوع من السعى نحو الأفضل , المسلم دوما أفضل و احسن و اجمل و اذكى , ودا طبعا بالسعي , ومفيش أبدا أبدا تضاد بين انك عاوز تبقا احسن و افضل و بين انك تبقا راضي باللي ربنا قسمه ليك , اشتغل و اسعى والنيتجة اللي ربنا يوفقك ليها ارضى بيها بدون سخط او حزن
سيدنا النبي بيقول : ("ارضَ بما قسم الله لك , تكن أغنى الناس") , فإياك تخلي الرضا عذر أنك تبطلى تسعى في الأرض و تحاول تبقا احسن عشان ربنا , عشان الاسلام
عشان كدا ارضى باللي ربنا رزقك بيه النهاردة و خلي عندك أمل دايما في بكرا انه يجي أحسن
خير خير خير , , , محدش عارف الخير فين
كان معكم
فتوح أبو المفاتيح – واحد من اللي هما إحنا
ليست هناك تعليقات:
إرسال تعليق