كتبت قبل كدا كتيب لطيف عن أساليب التعلم وإزاي ممكن نتعلم صح – أنا بقول ممكن – الطريقة دي بيسموها تصنيف بلووم للتعلم
المهم
في أصول العلم بيعرفوا العلم انه كوكتيل من ثلاث أشياء : إدراك و قواعد و مَلَكَةٌ
إحنا لو عرفنا الحاجات دي هنقدر نقرب من معنى كلمة علم
الإدراك : و هو قدرتك على الفهم و الاستيعاب و تخيل و تحليل ما يقال لك , نضيف على دا كله وجود قبول لديك لما تتعلمه , و دا أهم حاجة لأن بدون قبول يبقا مفيش ادراك و مفيش تفاعل و أنا مش هجوزك البت
القواعد : هي الأصول و المبادئ و القوانين والنظريات و الفلسفات و المصطلحات و هلم جرا من رغي كتير حطه أصحاب العلوم المختلفة على مر القرون الماضية
الملكات : عبارة عن نتيجة للإدراك و نعني بها الشخص اللي عنده قدرة أعلى على الإدراك + انه من قبل كدا ادرك حاجات كتير و عنده قدرة على استيعاب و استعادة القواعد المختلفة , ويمزج اللي فات دا مع تطبيق كثير وخبرة بتطبيق القواعد , يعني لو اعتبرنا إن الإدراك و القواعد عناصر طبق اليوم يبقا الملكات هي الطبخة بعد ما تستوي.
فهمنا العلم ؟ ؟ ؟ فلنأخذ العلم الديني كمثال
الدين هو منهج كامل للرقي و التهذيب و الحب لله و رسوله و للناس كلها , بس عشان نستفيد منه و نحقق تغيير بيه مينفعش عن طريق نقله من لسان لآخر و من ودن للتانية أو إننا نحفظ الكلام كويس و نردده زي البغبغان أو إننا نؤدي العبادات و الطقوس بشكلها الصوري.
تناول الدين بهذا الشكل قليل النفع , بل ممكن نقول انه مالوش فايدة , فيه واحد من التابعين قال : العلم علمان ,علم في القلب ,فذلك العلم النافع , و علم على اللسان , فذلك حجة الله على ابن آدم
و حجة عليه ليه؟؟؟ لأنه بيقوله بس و مش جواه و مدركه صح
برنارد شو – كاتب انجليزي جامد – قال : إذالقنت إنسانا شيئا فإنه لن يتعلم أبداً
و دا طبعاً اللي بيتعمل فينا في معظم البلدان العربية – إلا من رحم ربي و دخل تعليم أجنبي – حشو و تلقين و متلاقيش حد فاهم حاجة, عشان كدا متلاقيش كتير بيعمل صح لأنه في الأخير بعد ما يخلص الجامعة . . .متعلمش حاجة . . . معدوم الملكات
ديل كارنيجي بيقول : إن التَعلُم عمل إيجابي لا سلبي و نحن نتعلم حين نعمل , فإذا أردت الاستفادة من النصائح المذكورة في كتاب ما و مضاعفة الفائدة منها , جربها و اعمل بها و طبقها في كل فرصة تسنح لك , فإنك إن لم تفعل ذلك فسوف تنسى ما لُقنته و قرأته سريعاً
من تعاملي الكتير مع الأطفال و الشباب الصغير, فإن المعرفة التي نستخدمها هي وحدها التي تعلق في الأذهان
عشان كدا واحد من التابعيين قال : كنا نستعين على حفظ أحاديث رسول الله بالعمل بها
فنلاقي إن الإيمان بالله و برسوله هو عبارة عن اتباع خطى رسول الله , و إننا نمشي على خطاه , لأنه الترجمة و الشرح و التطبيق العملي للقرآن الكريم و لكل حاجة أمرنا بيها الله سبحانه و تعالى
عشان كدا في كل طرق التعلم الجديدة نلاقي إن الجانب العملي التطبيقي فيها كبير , ممكن يوصل ل 70% من المنهج , أنا لما بدرس للأطفال حاجة فإن الجانب النظري في الكورس لا يزيد عن 20% بأي حال من الأحوال
انا فاكر من اولى ثانوي الحاجات اللي كنا بنعملها في مادة الكيمياء . . . فاكر بس الكوارث اللي كنا بنعملها في المعمل بالمواد الكيميائية , , , أما لو سألتني كنا بنعمل ايه في الفصل , افتكر بس أننا كنا بنخلي المدرسة تشد شعرها و تصوت فينا , و عبثا كنا نحاول نقنعها إننا أغبية ومبنفهمش فمش لازم تشرح لينا , مترضاش و تكمل شرح
عارفين . . . المعلومات النظرية و الهجص الكتير اللي بناخده في المدارس و من ثم في الجامعات . . . كلها كلها بتضيع لو مطبقنهاش و استخدمناها في الحياة العملية
المعلومات دي بالضبط عاملة زي الأكل , الأكل لما بيتاكل بيروح في سكتين , الأولى : بيتحول لطاقة و تفكير و حرارة و مشاعر ويبني الجسم و يحركه , التاني : الجسم لا يستفاد منه و يطرده و كلنا عارفين هو بيروح فين
دا بالضبط عامل زينا لما بنتعلم الصلاة , بس احنا في موضوع التعلم دا شخصين , الأولاني اتعلمها و هو صغير لأن ابوه و أمه مسلمين فلازم يبقا زيهم , و التاني اتعلمها و هو كبير لأنه دخل الإسلام فلازم يتعلم الصلاة
الأولاني اللي اتعلمها و هو صغير خدها كأنها أحد الدروس و بعد ما عرفها , بدأ يصلي في الأوقات الخمسة لأنه مفروض يصلي في الأوقات الخمسة , وبقت بالنسبة ليه حركات روتينية بيعملها خمس مرات في اليوم والليلة
التاني اللي اتعلمها و هو كبير بيتعلمها و هو مشتاق , عنده مستوى من الإدراك عالي أوي أوي , فبيقدر يستوعب القواعد بسرعة , وبعد كدا بينمي ملكاته بشكل سريع لأنه مشتاق . . . مشتاق يقف بين ايدين ربنا و يكلمه , مشتاق يقف في خضوع و خشوع بين ايدين رب العالمين
قارن بين الشخص الأولاني و الشخص التاني بعدستة شهور من تعلمهم الصلاة . . . المقارنة لك لكي تتخيلها
عشان كدا نرجع و نقول إن العلم الصح بينتج عن إدراك و عمل
و دا برضه نفس الموضوع بالنسبة للتربية , زيها زي الدين , لازم تطبق و تعرف اللي بتتكلم عنه قبل ما تتكلم عنه , لأنك المفروض خير ممثل للي بتتكلم عنه
يعني , إذا أمرت بخير فأفعله أولاً , و إذا نهيت عن شر , فأبتعد عنه انت أولاً
و بعد كدا , بعد ما يكون الصح اللي انت عاوزه جزء منك , حتة منك , جزء من دمك . . . فلتبدأ تعليمه لغيرك لأن تصرفاتك , ولأن افعالك جميعها ستصبح هي الدلالة و الإشارة لهذا العلم , , , هتبقا أنت الدليل عن الحاجة الصح دي
لو انت بقا عملت عكس كدا , ربنا هيزعل منك و يكره التصرف دا جدا , يقول الله سبحانه و تعالى
("يَا أَيُّهَا الَّذِينَ آَمَنُوا لِمَ تَقُولُونَ مَا لَا تَفْعَلُونَ {2} كَبُرَ مَقْتاً عِندَ اللَّهِ أَن تَقُولُوا مَا لَا تَفْعَلُونَ")
اللي أنا أكيد منه , إن احنا مش بنقرا الكلام اللي فات دا لنفسنا , أكيد إحنا حلوين و كويسين لدرجة إننا لما نتعلم حاجة صح ,نحب إننا نعلمها لغيرنا , عشان كدا نقدر نعرف عمليه التعلم ببساطة أوي , انها ادراك أمور جديدة لحل مشاكل تواجهنا – وذلك من وجهة نظري كمهندس
يعني إن أي حاجة في الدنيا إحنا بنتعلمها عشان نحل بيها مشكلة – كمثال : و إحنا صغيرين علمونا حاجات كتير , منها إزاي تاكل عشان تحل مشكلة انك جعان , و إزاي تقعد على القصرية عشان تحل مشكلة تانية , و لما كبرنا شوية علمونا إزاي نمسك القلم عشان تحل مشكلة تدوينك لأفكارك و تخيلاتك كرسم أو كتابة , و القايمة واسعة جدا تقريبا بتشمل كل حاجة بنتعلمها عشان نحل بيها مشكلة –النقطة المهمة أن كل الحاجات دي بدون التدريب اللي حصل معاها مكناش عمرنا أبدا أبدا عرفنا نعملها و نجيدها بالشكل دا
لو عاوز تعلم حد حاجة جديدة , اعتمد المبدأ السابق و أمشي على الخطوات اللي جاية دي:
أسأل نفسك الأربع أسئلة دول و أكتب اجابتهم قبل ما تبدأ تعليمه
1- ما هي المشكلة ؟؟؟ دون بوضوح موضوع المشكلة و اوصفها وصفاً كاملاً
2- ما هو منشأ المشكلة ؟؟؟ لازم تعرف الأسباب و العوامل اللي خلت المشكلة دي تحصل
3- ما هي الحلول الممكنة لهذه المشكلة ؟؟؟ فكر و اقرأ و أسأل الناس عن حلولهم و مقترحاتهم للمشكلة دي , خد وجهات نظر مختلفة
4- ما هو أفضل الحلول ؟؟؟ احتفظ بكامل عقلك و متخليش المشكلة تدخلك في دوامة القلق . . . ايه أفضل حل للمشكلة طبقاً للنقاط الثلاث الماضية ؟؟؟ اختار حل وحيد و ابدأ في تطبيقه
الحل اللي انت اخترته دا انجح طريقة و وسيلة تعلمها للآخر و خليه يطبق و يتعامل و يتفاعل مع مشكلته بواسطة الحل المطروح أمامه بواسطتك
بس كدا
خير خير خير
محدش عارف الخير فين
كان معكم متفائلاً
فتوح أبو المفاتيح – واحد من اللي هما إحنا
ليست هناك تعليقات:
إرسال تعليق