كلمة بسيطة أوي , , , أعيش مبسوط
صح؟؟؟
كلنا نفسنا نعيش مباسيط – فيه ناس بتتكلم عن المجد و النجاح و الانتاج و إنهم حاجات حلوة خالص تقدر لما تحقق تخلي الواحد مبسوط
لو سلمنا إن 3 حاجات دول يقدروا يخلوا البني آدم مبسوط , فدا هخيلينا نخش في نقطتين نقاشيتين , أحب اوي أسمع رأيكم فيهم
أولا: هنتكلم عن المجد و النجاح و الأنتاج بشخصهم , ودا بدون علاقتهم بالسعادة
تمام ؟؟؟
ناس كتيرة بتفكر في موضوع الثلاثة العظام دول , و في اعتقادي إنهم نتاج لبعض , او نقول عليهم أوجه مختلفة لنفس العملة
المجد : انك تبقا راجل عظيم بين الناس , انك تكون فعال و مؤثر و إن اللي بتعمله بيجيب خير كتير للناس و للدين
النجاح : عندك آمال و أفكار و أماكن عاوز توصل ليها , فبوصولك للحاجات دي أنت تقدر توصف نفسك بأنك ناجح , وعلى هذا فإن وجهة النظر للنجاح تختلف من فرد لآخر و لازم كل واحد فينا يعرف ايه وجهة نظره في النجاح – أنا ضيعت وقت كتير في حياتي لأني كنت متأثر بوجهات نظر ناس تانيين عن النجاح و ضغط على نفسي و حاولت أحورها عشان تتوافق مع وجهة النظر دي ., خير , نعيد تاني و طبقا لوجهة نظرك عن النجاح تقدر توصف نفسك بأنك ناجح سواء كان هدفك دا مادي او معنوي , نفسي او عقلي , يعني مثلا واحد نفسه يتجوز و يعيش حياة مستقرة مع أهل بيته و نجح انه يحقق دا – يبقا دا شخص ناجح بكل معنى الكلمة
الأنتاج : عشان تبقا في مجد دا يتوقف على انتاجك , عشان تبقا ناجح دا يتوقف على انتاجك , ايه المنتج اللي هيطلع منك , ايه فايدة المنتج دا في خدمة حلمك و هدفك , و طبعا المنتج دا هيختلف من واحد للتاني طبقا للحلم و السكة اللي هو ماشي فيها
صح؟؟؟
هذه الثلاث أشياء عبارة عن طعوم و روائح و صور لذيذة شهية مذهلة شديدة الامتاع جوة كل واحد فينا , ولما بنحلم بيها بننبسط اوي و ننشكح و نحس بحاجات لطيفة خالص و كيوت . . . بس بكلمة أكثر واقعية . . . الحاجات دي وهم جوانا ولو متنا بكرا محدش هيعرف بيهم او يسمع عنهم او يقدر يشوفها
الحاجات دي عمرها ما هتبقى حقيقة و واقع غير لو مشينا وراها و سعينا لتحقيقها و خططنا ليها خطوة بخطوة و سلمة بسلمة , هعمل كذا بكرا و هعمل كذا الأسبوع الجاي و كمان ستة شهور هعمل كذا و كذا و كذا . . . وهلم جرا
و إيانا و إيانا و إيانا و اغراءات و حلم النجاح السريع أو المجد السريع وانت مش مستعد , لازم تقيم نفسك صح بشكل واقعي به بعض التفاؤل , لازم نظل ننتج و نجهز و نخطو عشان لما ننجح ننجح بثبات و متبقاش قفزة و تقع بعدها على رقبتك الحلوة تنكسر , وعليه تقضي فترة في حياتك محبط و مكتأب , تايه و مسطول مش عارف تعمل ايه و لا تروح فين , ولا منين يودي على فين . . . مش عارف و الله ممكن تسأل امبارح و هو يقولك . . . آ آ آ ه
يبقا اللي احنا محتاجينه هنا إن نفسنا تحدد هي عاوزة ايه و همها ايه , و تبذل نفسنا نفسها عشان الهدف دا و تحقيقه بخطوات حقيقية فعالة على أرض الواقع , و نعمل وصلة ما بين الحاجات الحلوة اللذيذة اللي جوا نفسنا مع الدنيا و الحركة الكتيرة اللي فيها عشان تبقا جزء منها حقيقي
ثانيا: هل السعادة انك تحصل على هذه الثلاث أشياء فقط ؟ ؟ يعني جبتهم و بقوا معاك خلاص هتبقا مبسوط و منشكح و اخر انبساط ؟ ؟ ؟
انا اعتقد أن ذلك ممكن فقط و اونلي لما تكون مقرونة بشوية حاجات
1- الفطرة . . . ترجع بنفسك للفطرة , الطبيعة كما أوجدها الله سبحانه وتعالى
2- لا تنتظر ميعادً او وقتا معينا لكي تبدأ في تحقيق ما ترغب او انك تبدأ تتحرك وتمشي و تدوس في الدنيا عشان تسعى لحلمك , ابدأ حالا فورا الآن
3- امتلك وقتك و احتفظ بحريتك أمام كل الظروف و المشاكل و المغريات المحيطة بك
4- لم نفسك و خلي بالك منها أحسن تنفرط نتيجة الحياة و الاحتكاك بالدنيا و المشاكل و المغريات اللي فيها – تب إلى الله و نقي نفسك و خلي الدين سلاحك قدام أي حاجة , تمسك به يحفظك من الانفراط
5- افرح , متعقدش الدنيا , افرح بأي حاجة بسيطة تحصل , افرح بأي حاجة ربنا رزقك بيها و لو ربع جنيه لقيته مرمي على الأرض , افرح لما تصحى الصبح تبص في السما تلاقيها زرقا و فيها سحابة شكلها حلو . . . افرح
6- عيش يومك , و عيش الدنيا لأن الحياة سموها حياة لأننا بنحيى فيها و نعيش , و مسموهاش قلق لأننا بنقلق فيها , يعني من الآخر عييييش
7- احرص على أن تحصل دوما من المال على الكثرة النافعة , اللي هو تجيب الفلوس اللي تكفيك و يفيض منها عشان تصرف على الخير , بيقولك . . . يكفي أن للاحسان فيض من الإسعاد يسري في الحنايا
8- احذر من الفراغ . . . اشغل نفسك بأي نافع , فإن فراغ المرء لص و انتحار
9- لما يحصل ليك مصيبة , أياك و الغرق فيها , ركز و فكر و خلي الدماغ صاااحي , ولا تحزن فإن بعد العسر يسرا
10- في طريقك للنجاح , أهم حاجة تحافظ على الحب , حبك للناس , و حب الناس ليك , حافظ على انسانيتك و عطفك و حنانك و رقة القلب و تألمها للمسكين , و مساعدة المظلوم
11- اجعل همك في الدنيا لله , و عملك لله , و نجاحك لله , يعني حياتك كلها لله , و اسعى بأن تكون لك نفسا مطمئنة
12- إياك ثم إياك ثم إياك إنك تدوس على حد عشان مصلحتك حتى لو ظلمك , أنت الأقوى لأنك مسلم حق , و المسلم لا يَظلم
13- لا تلق بالاً للمال , ولا تجزع لفقده , فهو من الله و إلى الله
خير خير خير . . . محدش عارف الخير فين
أنتم رأيكم ايه ؟؟؟
كان معكم داير لف في الأوضة
فتوح ابو المفاتيح – واحد من اللي هما إحنا
ليست هناك تعليقات:
إرسال تعليق